Lëtra pasturela per la Curëisema 2026: Ancunté Gejù Crist
Verscion curta
La Cureisema nes nvieia a cialé ino de viers de Gejù Crist. Ël nes à mpermetù de resté pra nëus - duc i dis. Chësta mpermetuda sustën nosta chemunanza, iust te n tëmp de mudazion y de smendrimënt di fediei che va mo te dlieja. Chël che conta ne ie nia tant che son mo boni de fé o de urganisé, ma che se abinon tl inuem de Gejù Crist y che vivon tres l’ancuntedes cun Ël.
La Dlieja vif tres l’ancuntedes cun Gejù Crist
Chësta ancuntedes possa avëi de plu formes: tla comunità che prëia y cianta, tres l scuté su la Parola de Die y tres la zelebrazion dl’Eucaristia. L Vescul lecorda che tres l Batëisum y la Cunfermazion sons tlamei y n grado de laudé Die, de cialè un sun l auter y de dé inant l Vaniele. La Dlieja vif ilo ulache la persones se abina tla fede y urientea si vita devier de Gejù Crist.
Ancunté Gejù Crist tla Parola de Die
La lëtra pasturela ti dà na gran mpurtanza ala Parola de Die. Tla Sacra Scritura ancuntons Gejù Crist nstes. Perchël dëssun ti dé ala Parola de Die tla funzions na lerch adateda, cun cura y atenzion. La zelebrazions dla Parola de Die ie na forma autonoma y preziëusa dla priera liturgica. Te chësta zelebrazions ie Gejù Crist prejënt canche si Parola vën lieta dant y scuteda su. Perchël vënieles tenides sciche Liturgia dla Parola, zënza dé ora la cumenion. Nscì pudons se abiné per scuté su la Parola che nes sustën te nosta fede.
L’Eucaristia - Zënter dla vita cristiana
Tl medemo tëmp cëla l Vescul de viers dla Eucaristia sciche zënter dla vita cristiana. Nce sce l ne ie nia plu puscibl tenì dloch y uni dumënia na Santa Mëssa, restla mpò funtana y mumënt de majera mpurtanza per nosc crëidum. Tla Mëssa se scinca Gejù Crist se nstës. Perchël iel de mpurtaza che i sënies de chësta zelebrazion vënie realisei deniamënter. Dant al dut nes mostra l offertorium cie che festejon: Nëus purton pan y vin - y cun chësc nosta vita - sun autere. Tla priera y tl cianté deberieda nes lascion tò ite y trasfurmé te Gejù Crist che se scinca.
La dumënia - Di dl Seniëur y dla Chemunanza
La dumënia resta l di dl Seniëur ulache n se anconta cun Die y cun la jënt. Duta la formes dl prië deberieda n chësc di - zelebrazion dla Parola de Die, Liturgia dl’ëures, liturgies de devozion y nce formes nueves dla priera - sustën la vita cristiana tla chemunanzes. Nosta liturgia dëssa unì zelebreda a na maniera che l dejidere de se ancunté uni dumënia cun Gejù Crist che se scinca a nëus tl pan y tl vin reste viva y vënie renfurzeda.
Rengraziamënt y ncurajamënt per na streda deberieda
Ala fin n rengraziamënt a duc chëi che juda pea a mëter ndrova te nosta chemuniteis la vita liturgica: ai prevesc y diacons, ala munighes y patri, a chëi y chëles che che mëina la zelebrazions dla parola, a chëi y chëles che dij dant la prieres y a duta la persones che juda pea. Tres si servisc y si prieres sentions: Gejù Crist ie danter nëus ite.
Nscì se nvieia la Curëisema a renfurzé l liam cun Gejù Crist: scutan su si Parola, prian deberieda y festejan l’Eucaristia. Jon cun crëta sun chësta streda - de viers dla lum, che nes vën scincheda da nuef tres la Pasca.
(Traduzion tl gherdëina: Theodor Rifesser)
