visualizzare il contenuto principale
Messaggi

San Miculau 2020: n bel salut a duc i pitli per la festa de San Miculau (ladino della Val Gardena)

Vescul Ivo Muser

Segonda Dumënia de Avënt; Festa de San Miculau, 6 de dezëmber 2020

Mi bon pitli mutons y pitla mutans,

 

vo ëis dessegur bele spià, che chëst’ann ie truep autramënter. Ënghe la festa de San Miculau ai 6 de dezëmber sarà autramënter. Ma pudon mpò festejé y tlo ëssi na blota idea …

De San Miculau vëniel cuntà tan de stories sciche de puec autri Sanc. Da nëus tlo te Südtirol iel ntëur 50 dliejes dedichedes a chësc Sant. Povester ne n cunescëis una o l’autra? La jënt ova na gran legrëza cun San Miculau, perchël contun mo al didancuei de d’ël. La stories nes conta, che ël ova gën la jënt, che ël ti judova ulache l pudova. Ël ova n gran cuer, dant al dut per chëi che vivova tla stënta y tl festide. Ël à cialà de udëi te duc l bën y de fé nstëss dl bën!

Sanc ie persones, che ie bones de nes fé sentì a na maniera speziela Chël Bel Die. Datrai ne vala nia de bujën de gran miraculi, ma me de pitli sënies plëns de amor. Una na storia conta, che San Miculau passova uni ann la sëira dan si cumplì di ani tres la zità, per ti lascé dan porta de bela scincundes ai mëndri che ova de bujën. Propi me nscì. Tei sënies sons duc boni de capì zënza gran pligazions. Chisc sënies nes dij: Bel, che te ies al mond!  Zënza te ne fossa mi vita nia tan bela! De gra! L ne và nia de bujën de truep, sce l vën dal cuer.

Son duc Miculau!

La festa de San Miculau possa nes lecurdé propi chëst’ann de udëi dant al dut l bën, sciche San Miculau. For ino dassons dì y mustré: Ie te ëi gën! Tu ies de gran valuta per me! Ie me mbinci che la te vede bona! Ie son tlo per te! Savëis’a perchël cie che ie ulëssi ve cunsië? Nëus son chëst’ann duc San Miculau!

Sciche San Miculau pudons nce nëus damandè: A chi possi pa ti fé dl bën? Povester te mi familia, cun na bona parola o cun n pitl sëni? O ti fé a zachei na pitla legrëza, sce la ne ti và nia drë bën? Nce cherdé su zachëi o ti mandé n pitl salut po’ ti fé legrëza. Nscì sarons duc un per l auter San Miculau. Nscì uniral fat dl bën nce tres nëus!

Sciche Vescul me ncunforti nce ie sun San Miculau. Ël ie per me sciche Vescul n gran y sant cumpani. Ël me lecorda me y nëus duc, cie che uel dì, vester cristiani: che mparon da Gejù a nes judé un cun l auter, che dajon inant la speranza y che ti dijon a duc: Die nes stà daujin, ël nes uel gën!

Prësc iel Nadel

La Festa de San Miculau nes dij: L ne dura nia plu giut pona iel Nadel. Ilo festejons l cumplì di ani de Gejù. Ël ie deventà sciche un de vo. Ël nes uel acumpanië tres duta la vita. Chësta ie la mpurtanza dl Nadel. Tan bel ie nosc crëidum!

Gejù ve benedësce, vosc genitors, vosc nëinesc y vosta laves, vosc fredesc y vosta surans y duc chëi che ëis gën, sun nterzescion dl Vescul San Miculau!

Vosc Vescul
Ivo

Segonda Dumënia de Avënt; Festa de San Miculau, 6 de dezëmber 2020

[Translate to Italiano:]