visualizzare il contenuto principale
Messaggi

Se tò dl’aurela cun Maria dan l Seniëur (ladino della Val Gardena)

Vescul Ivo Muser

Avënt 2020

Mi bona surans y mi bon fredesc te nosta Diozeja Bulsan-Persenon

„Sun ti parola: tulonse dl’aurela per …“ ie l tema anuel te nosta Diozeja.

Nvieie de cuer duc i fediei a se tò n mumënt de tëmp, sibe personalmënter che te duta la chemunanza, ai 8 de dezëmber, festa dl’Imaculata y dla loma de Die.

Dan 55 ani n chësta festa ie finà via l Cunzil Vatican II (1962 - 1965); dan cin ani n chësta festa ons finà via la Sinoda diozejana (2013 - 2015).

„Se tò dl’aurela cun Maria dan l Seniëur“:  dala 2 domesdi dëssa unì metù ora l Satiscim tl Dom de Persenon y de Bulsan, te duta la dliejes dla pluanies, di cunvënc y di santuares, tla capeles di spediei y dla cëses de paussa.

Se fermé tl chiet dëssa vester puscibl te duta la Diozeja fina la 6 domesdi: se tò dl’aurela, scuté su, dé resposta, avëi crëta y sëurantò la ncëria de Die - sciche Maria, loma de Die.

Festes o mumënc de priera bele prugramei per chësc domesdi dëssun sambën tenì. Nce da cësa ora possun se lië ala rë tres la priera, l se tò dl’aurela, l’adurazion, l rengraziamënt y l urientamënt de si vita de viers de Geju Crist. De gran mpurtanza ie la prieres che vën dites al post de dautri.

Ve nvieie duc a ve lië ite l di de chësta festa te na gran rë diozejana - uni un coche la ti và ora. Chësc se fermé y se tò dl’aurela dëssa vester n sëni scëmpl, de speranza y che nes lieia adum te n tëmp drët rie y pesoch. Persones che prëia ie persones che à speranza.

Ie prëi cun vo y ve prëi de vosta prieres.
Cun legrëza y speranza
Vosc Vescul
+ Ivo Muser

Avënt 2020