Pasca – a mesa l’isté
Ai 15 d’agost, a mesa le tëmp de vacanza, festejunse nosta plü grana y ince plü vedla festa de santa Maria. I festejun Pasca tla vita de chë ëra che á metü al monn Gejú. Zënza Maria ne esson nia Gejú y tres ëra podunse capí ci che Pasca ó dí por nos düc.
En chësta “Festa de Pasca da d’isté”, sciöche bele teologs medievai ti dijô, s’infida le credo dla dlijia da afermé che “Maria, do che ara é rovada ala fin dl tru de süa vita, é gnüda tuta sö tla gloria dl cil cun corp y anima”. Insciö dij l’ultima definiziun dl dogma dla dlijia che Papa Pio XII á incundé en la festa de Gnissant dl 1950.
Nia cult dl corp, mo reconescimënt dl corp
Le cult dl corp á arjunt aldedaincö livei che fej tëma. Nia püces porsones fej de gran bries por avëi n corp tres plü perfet. Sovënz nes vëgnel mostré n ideal olá che ma n corp sann, jonn, bel, sportif, atraënt é “in”. Dal’atra pert él bëgn ince tröpes porsones che sá a ci soferënzes y ci prighi che ares ti vá adincuntra da redüje so corp, y insciö ince se instësses, a na imaja stereotipa. Dantadöt jënt jona se sënt dejorientada canche ara s’intënn che so corp y süa personalité ne corespogn nia ai ideai de fisicité y de belëza, indlunch da odëi.
Le corp é deplü co fisicité: al é nosta vita, nosta sessualité, nosc müs, nosc toché la man, nosc ri y pité, nostes ersperiënze, posiziuns y relaziuns, nosc ester y nosc fá, nosc svilup y nosc messëi morí. Nosc corp é ince fat de ferides, chëres che nes é gnüdes fates y chëres che i fajun ai atri. Nosc corp cunta la storia de nosta vita, dij da olá che i gnun y mostra nosta identité. Gní tuc sö tl cil cun corp y anima ó dí: Le corp á da fá cun le cil, deache al al fej pert dl’umanité. Porchël ne pó le corp nia gní degradé a n oget, a na cossa ma da adoré. ”O ne savëise nia, che osc corp é n tëmpl dl Spirit Sant, che abitëia te os y ch’i ëis ciafé da Idî ?» nes damana ince ciamó incö l’apostul Paul (1 Cor 6,19).
Chirí la perfeziun dl corp ne n’é nia da cristian, mo gnanca desprijé le corp. Ci che i festejun ai 15 d’agost é na conseguënza dla vijiun cristiana de co che i odun Chël Bel Dî y la porsona y n cuntrapunt cristian a les idees y minunghes che umiliëia y svalutëia i atri – anfat chi che al é. Trëi propostes concretes pó fá chësta festa atuala y concreta:
1. N “no” sterch a vigni forma de violënza cuntra les ëres
La plü grana de dötes les festes de santa Maria é ince n amonimënt tler cuntra vigni violënza sön les ëres, che é n tema presënt vigni de. La violënza sön les ëres vá da opresciun psicologica a agresciuns fisiches plü posoces. I tröc omizig de ëres é da se sperde y da dodé. Ince l’abus sessual é na gran violaziun dla dignité dla ëra. En ocajiun dl de internazional por l’eliminaziun dla violënza cuntra les ëres, ai 25 de novëmber 2020, á dit Papa Francësch: “Massa gonot vëgn les ëres ofenüdes, maltratades, violentades, sforzades ala prostituziun. Sce i orun n monn miú, che sides na ciasa de pesc y nia n ciamp de vera, messunse fá tröp deplü por la dignité de vigni ëra.”
2. Respet por vigni porsona
Chësta festa oj nosta odlada sön Maria, la uma de Gejú, la pröma porsona salvada de plëgn. Tan grana é la mosöra de Chël Bel Dî devers dla porsona. Al n’é nia uman y nia da cristian ponsé y baié mal dla porsona, da la desprijé y descredité, da la fá picera y ti tó so valur y süa dignité. I media nüs, cun dessigü tröpes poscibilités bunes y de gran ütl, pó ince gní adorá malamënter, canche porsones atachëia d’atres porsones cun parores agressives, les fej fora stletes y les stlüj fora dla sozieté. "Shitstorm" ti dijon incö a na forma de esecuziun mediatica. Y n’atra espresciun negativa é "fake news" o "verites alternatives". Da ion vëgnel fat rodé parores y afermaziuns falzes. Chësc cheriëia malsegurté, malfidënza, sospëc y chësc intossiëia raporc soziai, politics y personai!
L’adoré mal le lingaz, mëte fora falsités, meses verités y teories de cospiraziun che fej tëma, comentars anonims che ofënn y umiliëia tl internet, é n sëgn de n svilup prigorus.
3. I sun corp y anima
La festa de Santa Maria dal Ciüf nes dá na vijiun positiva dl corp, dla tera, de döta la creaziun. Cun chësta festa él la dlijia che intonëia n inn da Nadé y da Pasca a onur dl corp y le mët en relaziun cun le divin. Corona é tres ciamó n tema dër presënt. Ara ne n vá dla sanité dl corp, na cossa che reverda dötes y düc y che á te nosta sozieté na gran priorité. Zënza dübe: la sconanza dla sanité, ince tres la variora, é nezesciara, bona y importanta – y ince espresciun de responsabilité, solidarieté y respet. Mo Corona nes confrontëia ince cun na verité, cun chëra che nosta sozieté se fej bëgn dër ert: la vita umana é y resta vulnerabla, al prigo, delicata y mortala – dan y ince do Corona. Co ciarera pa fora cun la sconanza de nosta anima? Ci “variora”, de ci cura, ci atenziun adora pa nosta anima? Fajunse assá por la sanité de nosta anima? Canche i imparun indô da reconësce nüsc confins, spo imparunse ince a vire. Canche i capiun indô che le ester é plü important che l’avëi y le orëi tres deplü, ti rovunse plü daimpró ala scincunda y al mister dla vita. I ne sun nia ma corp, mo ince anima! “Ci ti joel pa a na porsona, sce ara davagna döt le monn, mo se perd y se rüna se instës?" nes dij Gejú instës. (Lc 9,25) Nia tan lungia che nosta vita sön chësc monn é ne cunta, mo co che i la viun! Á Corona la forza da se fá plü umanes y umans? Al ó ester la bona orenté da ponsé do y ti ciaré avisa ales priorités de nosta vita y de nosta sozieté y da se comedé. Al ti fajess bun a döta l’umanité y döta la creaziun.
Maria sëgn de speranza y de consolaziun
Tl Magnificat, la ciantia de lalt de Maria, nes vëgnel scinché le motif prinzipal de chësta festa: “Mia anima lalda la grandëza dl Signur, y mi spirit iubilëia por Dî, mi salvatur. Deach’al á ciaré al’umilté de süa fancela. Ciarede, dötes les generaziuns me dij da sëgn inant beata.” (Lc 1,47-48) Ponsun ala grandëza de Chël Bel Dî, dla porsona, de nosc dagní.
„Le Signur é veramënter ressorí“: Chësta testimonianza da Pasca é la tiza che á impié nosta fede cristiana. Maria tuta sö tl cil nes mostra ci che nes é ince scinché cun la mort y ressoreziun de Gejú: la Pasca dl’umanité, nosta Pasca á metü man. Nos sun cheriá y orüs por le cil – cun corp y anima.
A os de cör n bel salüt da d’isté y na benedisciun plëna de speranza por la “Pasca da d’isté”
