Zum Hauptinhalt springen
Botschaften & Stellungnahmen

Cun l’Anmaria tres l Avënt y tres dut l ann

Vescul Ivo Muser

Prima dumënia de Avënt, ai 29 de nuvëmber 2020

 

 

„L’Anmaria“

 

L Angiul dl Seniëur

à anunzià a Maria

y ëila à cunzepì per opera dl Spirt Sant.

Ave Maria …

 

Maria à dit:

„Ie son la fancela dl Seniëur,

l suzede cun me sciche t’és dit“.

Ave Maria …

 

Y la parola de Die s’à fat cërn

y ie unida a sté danter nëus.

Ave Maria …

 

Prëia per nëus, santa Oma de Die,

che deventonse dënies

de cie che Gejù nes à mpermetù!

 

Prion. Die uniputënt, mplenësc nosc cueres de ti grazia. Cun l’anunziazion dl angiul ons cunesciù l’incarnazion de Gejù Crist, ti Fi. Fé che deventonse dënies, per i meric de si pascion y mort, de ruvé ala gloria dla ressurezion. Per Gejù Crist, nosc Seniëur. Amen.

 

Mi bona surans y mi bon fredesc te nosta Diozeja Bulsan-Persenon!

„Sun ti parola: se tò la dlaurela per …“

L’Anmaria toca bën pra la plu bela y pra la prieres plu cunesciudes che on. Pudon la ntënder y la prië sciche n ressumé dla fede cristiana. Dal 13ejim secul incà vëniel sunà l’Anmaria. La ciampanes nes nvieia uni di da duman, da mesdi y da sëira a se tò la dlaurela de medité cun Maria l mistere dl’incarnazion de Die. Dai 15 de agost - festa dla Gran Santa Maria - dl ann 1954 incà prëia l Papa uni dumënia y uni festa l’Anmaria publicamënter.

Ciuldì prions’a l’Anmaria?

Prië uel dì se tò dlaurela per: Lascion per n mumënt chël che son tl lëur de fé. Nëus se giaurion a Chël Bel Die. Se ntendon che Ël ie tlo. Dut scumëncia cun chësta ntenzion.

Prië uel dì audì: „Mo dan cunzepì te si corp ala cunzepì te si urëdla“, dij Sant Agostin de Maria. Scuté su cun lezitënza. Audì ora Chël Bel Die y si parola danter duta l’autra ujes da uni di. Jì cun Maria sul troi dl’incarnazion de Die. 

Prië uel dì dé resposta: Maria à dat n sci sciche resposta - zënza savëi cie che ti aspitova, ma cun crëta - fin sota la crëusc de si fi. Ëila resta pra si sci che la à dat.

Prië uel dì avëi crëta: Chël Bel Die nes cunësc. Degun destin vierc ne cumanda de nosta vita, nosc daunì ne n’ie nia da crì tla stëiles. Nëus fajon pert dla storia dla salvëza de Die. Tres Gejù Crist, fi de Die y mut de Maria, se à metù Die per for da nosta pert. Ël và deberieda cun nëus y nes và danora: tres la crëusc ala ressurezion.

Prië uel dì sëurantò la ncëria de Die: Sciche a Maria dij Die nce a nëus: Ie te adrovi! L miracul dl’incarnazion de Die suzed ilo, ulache l se anconta l sci de Chël Bel Die cun l sci dla persona. Tla plëina liedëza nes lascel tò la dezijion n cont dla resposta a si dumanda, sce sëurantulon si ncëria.

 

Cun l’Anmaria tres l Avënt y tres dut l ann

Ie ve nviei duc canc a prué de ve tò dlaurela pra l’Anmaria: dala prima dumënia de Avënt fina ala Ueia de Nadel. Povester devëntel dainora na bona usanza da uni di che nes acumpanieia tres dut l ann. Propi chësc „tëmp de Corona“ cun dutes si melsegurëzes, minonghes, ujes, ghiranzes y tëmes nes nvieia a se tò cun cuscienza la dlaurela per l’urazion.  L’Anmaria possun prië dlonch ora: ntan l cujiné, tl bus, ntan che n furnea cun l auto, ntan che n và a spaz, sciche priera dan jì a maië, pra na senteda …, da sëui o adum cun d’autri, adaut o achiet. L se trata de na spiritualità da uni di.

Ie ve prëi, dantaldut vo genitors y vo nëinesc y laves, de prië l’Anmaries nce cun i pitli, mutans y mutons, y ti fé cunëscer chësta urazion.

Ie ti diji n bel Die ve l paie a duc chëi che forma cun l’Anmaries na rë de urazion che nes lieia tla dlieja locala y tl mond: personalmënter, te families, comuniteies de cësa, comuniteies de cunvënt, cëses de paussa y dlonch ilo, ulache personenes credëntes viv deberieda.

L’Anmaries dessa nce vester na urazion che dà speranza y nes mëina y acumpanieia tres la pandemia dl Corona. „Y la parola de Die s’à fat cërn y ie unida a sté danter nëus“ (Gn 1,14) - cun duta la cunseguenzes dala cianel ala crëusc. Gejù Crist cunësc la vita umana tres esperienza. Ël partësc chësta vita cun nëus, fin tl plu sot de si patimënt. Ël ie l „Die cun nëus y per nëus“ - sën, nce ntan chësta burta esperienza de chësta malatia y nchinamei sëura l pont de mort ora.

Se tò dlaurela, audì, dé resposta avëi crëta y sëurantò la ncëria de Die - sciche Maria, la loma de Die. Ie prëie cun vo duc y ve prëi de vosta urazion.

Vosc Vescul
+ Ivo Muser

Prima dumënia de Avënt, ai 29 de nuvëmber 2020