Lëtra pastorala por la Carsëma 2026: Incunté Gejú Crist
Verjiun cörta
La Carsëma nes inviëia a oje nosta odlada indô danü sön Gejú Crist. Al nes á impormetü da ester pro nos – düc i dis. Chësta impormetüda sostëgn nosta comunité, dantadöt te n tëmp de mudaziuns, olache tres manco jënt tol pert ales funziuns liturgiches. Ci co cunta n’é nia tan ci che i sun bogn da fá o da organisé, mo bëgn che i s’abinun tl inom de Gejú Crist y che i viun dl’incuntada cun ël.
La Dlijia vir tres l’incuntada cun Gejú Crist
Chësta incuntada é te deplü manires: tla comunité co prëia y cianta, tl ascuté la Parora de Dî y tles zelebraziuns dl’Eucaristia. Le Vësco recorda che tres le bato y la crejima sunse cherdá y ince n grado de laldé Chël Bel Dî, da ciaré un sön l’ater y da dé inant le Vangele. La Dlijia vir dailó, olache porsones s’abina tla fede y orientëia süa vita do Gejú Crist.
Incunté Gejú Crist tla Parora de Dî
N azënt particolar mët la lëtra pastorala sön la Parora de Dî. Tla Sacra Scritöra incuntunse Gejú Crist instës. Porchël desson ti lascé lerch ala Parora de Dî te nostes zelebraziuns, la curé y ti dé n’atenziun particolara. Zelebraziuns dla Parora é na forma autonoma y preziosa de oraziun liturgica. Te chëstes zelebraziuns é Gejú Crist presënt canche süa Parora vëgn lita dant y ascutada sö. Porchël vëgneres tignides sciöche Liturgia dla Parora, zënza partí fora la comuniun. Insciö podunse se lascé cherdé y baié ados dla Parora de Dî che nes renforza sön nosc tru de fede.
L’Eucaristia – zënter dla vita cristiana
Tal medemo momënt ciara le Vësco sön l’Eucaristia sciöche zënter dla vita cristiana. Ince sce ara ne vá nia plü da zelebré indlunch vigni domënia na mëssa, restera fontana y momënt plü important de nosta fede. Te ëra se scinca Gejú Crist instës. Porchël él important che i sëgns de chësta zelebraziun vëgnes zelebrá cun dignité y cosciënza. Dantadöt él l’ofertore che nes mostra ci che i festejun: I portun pan y vin – y cun chisc nosta vita – sön alté. Tla oraziun y tl cianté deboriada se lasciunse tó ite y trasformé te Gejú Crist co se scinca.
La domënia – de dl Signur y dla comunité
La domënia resta le de dl Signur, n de da s’incunté cun Chël Bel Dî y danter nos. Dötes les formes da perié deboriada en chësc de - – zelebraziuns dla Parora zënza comuniun, la liturgia dles ores, devoziuns o ince formes nöies de oraziun – renforza chësc zënter y dá sostëgn ala vita cristiana tles comunités. Nosta liturgia messess gní zelebrada insciö che le dejider da s’incunté la domënia cun Gejú Crist, che se scinca a nos tl pan y tl vin, se mantëgnes vi y vëgnes ince promoiü.
Dilan y incorajamënt por n tru deboriada
Inultima stál n dilan a dötes y düc chi che porta para la vita liturgica te nostes comunités: ai proi y diacons, porsones de convënt, ales conduturies y conduturs de zelebraziuns dla Parora, a chi co prëia dant y a dötes les porsones co tol pert ales funziuns. Tres so sorvisc y sües oraziuns sintiunse: Gejú Crist é danter nos.
Insciö nes inviëia la Carsëma da renforzé le lian cun Gejú Crist: ascutan süa Parora, perian deboriada y festejan l’Eucaristia. Jun ma do chësc tru cun crëta – adincuntra ala löm che nes vëgn scincada danü tres la Pasca.
